Marengs súkkulaðidraumur

Jæja ég er ekki horfin af yfirborði jarðar!! Er bara búin að vera í brúðkaupsferð í Miami og svo fór ég til Svíþjóðar í vinnuferð að skoða barnaverndina þar í landi. En ég segi ykkur frá þessum ferðum fljótlega :)

Ætla að deila með ykkur sjúklega góðri köku, marengs súkkulaðidraum sem ég setti inn á bloggið hjá Gott í Matinn um daginn og sló algjörlega í gegn. Þetta er algjör bomba! en svoooo þess virði :)

Marengs súkkulaðidraumur

Þessa köku gerði ég fyrir Eurovision partí fjölskyldunnar. Ég gat hreinlega ekki ákveðið hvort ég ætti að gera djúsí súkkulaðiköku eða marengs köku svo ég bakaði bara bæði og skellti þeim saman ásamt ýmsu gúmmelaði á milli. Kakan vakti mikla lukku og fannst þeim hún ennþá betri daginn eftir! Þetta er algjör draumur sem slær allt út þegar þið fáið þörf fyrir eitthvað sætt, djúsí og ógleymanlega gott!

 Súkkulaðibotn

225 sykur

110 hveiti

24 g. dökkt kakó

1 tsk. matarsódi

½ tsk. lyftiduft

½ tsk. salt

1 egg

180 ml. súrmjólk

60 ml. olía

1 tsk. vanilludropar

2 msk. kaffi

Aðferð

Blandið saman sykri, hveiti, kakói, matarsóda, lyftidufti og salti í skál. Blandið eggjunum saman við og hrærið léttilega, setjið svo strax súrmjólkina og olíuna saman við og hrærið léttilega. Setjið því næst kaffið og vanilludropana saman við og hrærið á meðal hraða þar til allt hefur blandast vel saman. Passið ykkur að hræra ekki of lengi því þá getur kakan orðið seig. Deigið er mjög þunnt í sér. Hellið deiginu í smurt meðalstórt hringlaga bökunarform og bakið við 180 gráður í rúmar 30 mín. eða þar til tannstöngull kemur hreinn upp úr miðju kökunnar. Kælið kökuna.

Súkkulaðikrem

3 eggjarauður

(geymið eggjahvíturnar í marengsinn)

100 g. flórsykur

30 g. smjör

150 g. dökkt súkkulaði

1 tsk. vanilludropar

Aðferð

Þeytið eggjarauðurnar og flórsykurinn saman þar til blandan er orðin ljós og létt. Bræðið súkkulaðið ásamt smjörinu í potti yfir meðal hita og blandið svo saman við blönduna, bætið vanilludropum saman við. Hrærið þar til allt hefur blandast vel saman.

Gott er að láta súkkulaðikremið standa í smá stund áður en það er sett á kökuna. Smyrjið kreminu yfir kökuna og á hliðar hennar.

 Fyrir þá sem vilja bara súkkulaðiköku þá geti þið annað hvort bara haft súkkulaðikremið á kökunni, raðað jarðaberjum á kökuna eða sett bæði jarðaber og oreo kex. En þeir sem vilja eitthvað aðeins meira bæta við rjómanum og marengs botninum.

Þegar súkkulaðið er komið ofan á kökuna þá setti ég á milli

1 litla öskju af jarðaberjum skorin niður

8 stk. oreo kex

½ lítra rjóma

Serið jarðaberin niður í sneiðar og raðið fallega á kökuna, geymið restina svo til þess að setja ofan á kökuna. Skerið Oreo kexið gróft niður og dreifið yfir jarðaberin. Þeytið rjómann og smyrjið honum yfir allt. Setjið Marengs botninn ofan á og skreytið af vild, ég setti afganginn af jarðaberjunum og bræddi örlítið súkkulaði í potti ca. 40. g. af dökku súkkulaði.

 Marengs

3 stk. eggjahvítur

170 g. sykur

½ tsk. lyftiduft

40 g. rice crispies

Aðferð

Til þess að marengs heppnist þá þarf að passa það að skálin sé mjög hrein annars gæti hann fallið.

Hrærið eggjahvíturnar og sykurinn saman þangað til blandan er orðin stíf. Bætið lyftiduftinu saman við og hrærið vel.  Bætið rice crispies saman við og hrærið varlega saman með sleif.

Setjið smjörpappír á bökunarplötu, takið formið sem þið bökuðuð súkkulaðikökuna í og dragið hring á smjörpappírinn. Dreifið úr marengsinum á hringinn og reynið að fara ekki útfyrir línurnar.

Bakið við 150 gráðu hita í rúmar 40 til 50 mín. eða þar til marengsinn er þurr viðkomu. Kælið. 

Þangað til næst!

Thelma