Afmæli og ameríska skúffukakan hennar mömmu!

Í dag á ég afmæli! Ég kom víst út með látum í brjáluðu veðri og mamma varla komst á fæðingardeildina á sjúkrahúsinu á Akureyri. Veðrið var öllu skárra í dag en samt svona aðeins að minna á sig.

Ég fékk sendar fallegar rósir frá Mr. Handsome í vinnuna, þar vann hann sér inn prik! 

það beið mín svo pakki frá mömmu þegar ég kom heim og að sjálfsögðu var það kökudiskur, en ekki hvað!

Í tilefni dagsins ætla ég að baka eina af mínum uppáhaldskökum allra tíma. Það er Ameríska skúffukakan hennar mömmu, hún er í bókinni minni Freistingar Thelmu, en ég ætla að deila með ykkur uppskriftinni hér að neðan.

Ameríska skúffukakan

hennar mömmu

Einu sinni var þetta eina kakan sem ég bakaði. Ég baka hana á öllum tímum

dags og meira að segja seint að kvöldi til þegar mig hefur langað í eitthvað gott

og sætt. Þessi kaka er búin að vera í fjölskyldunni í yfir 30 ár og klikkar aldrei.

Skúffukakan hennar mömmu er orðin þekkt á meðal vina og vandamanna

og er einstaklega mjúk með dökku súkkulaðiglassúri. Hún er best heit með

ískaldri mjólk, en líka góð daginn eftir, og daginn eftir og daginn eftir.

Innihald

4 egg

420 g sykur

320 g hveiti

3 msk dökkt kakó

frekar kúfaðar

5 tsk lyftiduft

2 dl mjólk

120 g brætt smjör

Súkkulaðiglassúr

1 pk flórsykur

3 msk dökkt kakó

60 g brætt smjör

2 msk tilbúið kaffi

heitt vatn

Aðferð

Hitið ofninn í 180°C og smyrjið ofnskúffu að innan. Þeytið egg og sykur saman þar

til blandan verður ljós og létt, eða í u.þ.b. 5 mínútur. Blandið hveiti, kakói og lyftidufti

saman í skál og hrærið. Bætið því saman við blönduna ásamt mjólkinni og brædda

smjörinu og hrærið þar til allt hefur blandast vel saman. Skafið vel hliðarnar á skálinni

inn á milli til þess að allt blandist vel. Hellið deiginu í ofnskúffuna og dreifið því jafnt með

sleif. Bakið í 20 mínútur eða þar til tannstöngull kemur hreinn upp úr miðju kökunnar.

Kælið kökuna í 3-5 mínútur áður en þið setjið glassúrið ofan á.

Súkkulaðiglassúr

Hrærið flórsykur og kakó saman. Bræðið smjör og hellið saman við. Bætið því næst

kaffi út í og hrærið vel. Bætið heitu vatni saman við þar til allt hefur náð að blandast vel

saman og kremið er orðið mjúkt og slétt. Bætið aðeins litlu magni af vatni saman við í

einu og hrærið vel á milli.

Gott er að stinga nokkur göt á kökuna með prjóni til þess að láta glassúrið leka inn í

kökuna. Smyrjið súkkulaðiglassúrinu ofan á kökuna og stráið kókos yfir.

Best er að geyma kökuna svo í loftþéttum umbúðum, t.d. set ég hana alltaf inn í ofn og geymi hana þar, þá helst hún mjúk í nokkra daga þar til hún klárast.....ef það gerist þá ekki strax!

Þangað til næst!
Thelma